بقايا مبعثرة

دمرت النفس يا عبدالله !

10
"مارس"
التعليقات: 8 | التاريخ : 2011/03/10
بسم الله ،، اليوم راح أترك بقايا مني ( ما أقصد المدونة ) للأبد بإذن الله !
عمري ١٧ سنه .. أدري أغلبكم مو مصدق بس مو هي قضيتنا .. عموما
قررت اليوم أترك عادات مدري تحت ايش اصنفها لكن لكم حرية التصنيف !
١٧ سنه ضيعت نصها اذا ما كان أغلبها .. في تدمير حياتي !
مدري ليه اليوم وماكان من قبل .. لكن أقرر متأخر أحسن من إني أستمر بالغلط !
ماني عارف كيف أقولها لكن للأسف كنت أضر صحتي بالتدخين ومشتقاته !
أنا عارف في كثير من أهلي يقرون الان هالكلام لكن الإعتراف بالذنب فضيلة زي مايقولون !
كانت حياتي اليومية بسبته كلها خوف من أي أحد يشوفني أو شي زي كذا !
مدري ليه الإستعباط وقتها مع إني عارف أضراره ونتايجه بعد فترة وش بيصير !
لكن الخوف ذا خلاني أعيش اشياء أنا بغنى عنها .. وشفت بعيني أشياء بسبته ماتتصدق !
لو كان شي عادي كان ما احتجت إني أكون مختفي كل شويتين وارجع وأنا متوتر !
كان يعدل المزاج ؟ لا
رجولة ؟ لا
فيه فايده ؟ بعد لا
ليش طيب ؟ ما أدري
لكن مدري وش اللي علقني فيه وخلاني ما أتركه حتى مع نصائح البعض ؟!!
طيب أنا ليش كتبت هنا ذا الكلام أو ضيعت وقتي ووقتكم فيه ؟
مافي سبب محدد بس ممكن عشان لو ضعفت في يوم من الأيام وفكرت أرجعله ؟
أقرا هذا الكلام ويعزز إصراري بإني أبعد عنه لأقصى درجه ممكنه عنه !
عموماً أنا ما أبغا أضيع وقتكم في كلام هو مجرد اعتراف لنفسي ومايحتاج أحد يقراه
لذلك راح أوفر الكلام الطويل لنفسي و أوفر وقتكم لتدوينات أحسن من ذي إن شاء الله !
كنت راح أقفل التعليقات هنا لكن لايضر بعض النصائح منكم أو أي شي يدفعني للأمام بإذن الله !
وأدري إنه أول شي اتكلم فيه هنا وشي مايستاهل لكن لعلها تكون فاتحه خير إن شا الله و يستفيد أحد من الكلام اللي كتبته فوق ونكون حققنا شي من مجرد اعتراف !
“يا اللي حرقت قلبي لأجل شينين .. حظي العاثر والا دنيا رديه ؟
لا والـذي خـلاك بيـد المـهــابـيـل .. أعيش من دونك ونفسي هنيه ! “
وآسف اني طولت عليكم !
عبدالله : ) !

 

 

أهلاً~!

24
"فبراير"
التعليقات: 9 | التاريخ : 2011/02/24
مساء الخير ،، ولأول مرة أمسي فيها عليكم من خلال هذي المدونة : ) !
اليوم يوافق عدة أشياء ، منها استلام سيارتي الجديدة ، افتتاح مدونتي ، وانتهاء مبادرة رواد لمساعدة متضرري سيول جدة.
قبل ما ابدأ بالتدوين هنا ، أحب أوضح بعض النقاط .
*المدونة توضح وجهات نظري الخاصة.
*راح أضع بعض من خواطري ، مو ضروري اكون متقن لهذا الامر.
*راح احاول أني اكتب بالفصحى قدر الإمكان ، لست متقناً ايضاً.
*راح اكتب يومياتي شي أكيد ، لكن مو شرط بشكل يومي.
وهذي كانت اهم النقاط !
وأخيراً قدرت أنهي أول تدوينة.. فمان الله =)